ភ្នំពេញ៖ ចៅទាំង២២នាក់របស់សម្ដេចតេជោបានមកលេងជាមួយសម្ដេចនៅថ្ងៃនេះបន្ទាប់ពីសម្ដេចបានចូលរួមកិច្ចប្រជុំកំពូលអាស៊ាន និងបានទទួលញញួរតំណាងប្រធានអាស៊ានកាលពីថ្ងៃសុក្រ។
សម្ដេចតេជោបានសរសេរនៅលើហ្វេសបុករបស់សម្ដេចថា៖ «ជីតាដែលមានចៅច្រើន។ ថ្ងៃនេះជុំគ្នារវាងចៅទី២១និងចៅទី២២ និងចៅផ្សេងទៀតមករត់លេងក្នុងការិយាល័យធ្វើការរបស់ជីតា»។
កាលពីម្សិលមិញសម្ដេចក៏បានសរសេរបង្ហាញអារម្មណ៍នឹកនាដល់ចៅសម្ដេចទាំងអស់ផងដែរ បន្ទាប់ពីសម្ដេចបានហាត់ប្រាណរួច។
សម្ដេចតេជោបានលើកឡើងថា៖ «ប្រជុំអាស៊ាន៣ថ្ងៃជាប់គ្នាពុំមានពេលហាត់ប្រាណសោះ។ ថ្ងៃនេះឆ្លៀតពេលហាត់ប្រាណដោយការធាក់កង់រយៈពេល ៨០នាទីបានចម្ងាយជាង ៥០គីឡូម៉ែត្រ ដោយជិះឡើងទួល ៤អង្សា។ ប្រសិនគិតចម្ងាយផ្លូវអាចចូលក្នុងដីខេត្តកំពង់ស្ពឺ ឬតាកែវ តែទីបំផុតនៅផ្ទះតាខ្មៅសោះ។ ល្ងាចថ្ងៃសុក្ររង់ចាំមើលផ្លូវចៅៗមកលេងនិងបាយល្ងាចជាមួយគ្នា។ នេះហើយជារសជាតិនៃជីវិត ពេលថ្ងៃរសៀល និងជារសជាតិនៃជីវិតជាជីតារបស់ចៅៗដែលតែងតែនឹកដល់ពួកគេដូចពាក្យចាស់ពោលថា (ស្រឡាញ់កូនមួយតៅស្រឡាញ់ចៅមួយថាំង)។
នាយករដ្ឋមន្ត្រីកម្ពុជា សម្ដេចតេជោ ហ៊ុន សែន មកដល់ពេលនេះមានចៅសរុប ២២នាក់ ក្នុងនោះចៅប្រុស ១២នាក់ ចៅស្រី ១០នាក់។ សម្ដេចធ្លាប់លើកឡើងចង់ឲ្យចៅរបស់សម្ដេចបង្កើតជាក្រុមកីឡាបាល់ទាត់បុរស បាល់ទះនារី ឬកីឡាផ្សេងទៀតដែលប្រើមនុស្សតិចជាង ១២នាក់ ជាងនេះទៅទៀតសម្ដេចក៏នឹងបង្កើតវង់ភ្លេងតន្ត្រីសម័យរបស់ចៅៗសម្ដេចមួយវង់ទៀតផងដែរ៕